Në një kohë kur zërat e drejtë shpesh mbyten nga propaganda, servilizmi dhe heshtja kolektive, Alesia Balliu ngrihet si një ndër figurat më të forta dhe autentike të brezit të saj. E njohur për qëndrimet e qarta, gjuhën e drejtpërdrejtë dhe përfshirjen e saj aktive në kauza shoqërore dhe politike, Alesia nuk i di t’i shmanget debatit.

E ftuar në “Podcastin e Suksesit”, ajo ndau zhgënjimin e saj me Partinë Demokratike – një subjekt që dikur përfaqësonte bindjet e saj ideologjike, por që sot, sipas saj, ka humbur dinjitetin dhe drejtimin. Megjithatë, ajo mbetet e qëndrueshme në vlerat e së djathtës, duke mos lejuar që zhgënjimi të kthehet në dorëzim. Për të, të qenit kritik nuk do të thotë të jesh kundër, por të kërkosh më shumë nga ata që pretendojnë të përfaqësojnë interesat publike.

Alesia nuk është vetëm një aktiviste me zë të fortë, por edhe një autore që di të gërmojë thellë në psikologjinë e individit dhe të shoqërisë. Në librin “Tabula Rasa”, ajo e sheh njeriun si një fletë bosh që duhet rishkruar, një udhëtim drejt vetëdijes dhe shërimit përmes përballjes me të vërtetën. Ndërsa në “White Leviathan”, ajo sjell një vepër tronditëse që i fton lexuesit të reflektojnë mbi mekanizmat e pushtetit dhe frikës, mbi përbindëshat e padukshëm që sundojnë shoqërinë moderne.

E vendosur, e drejtë dhe e pakompromis, Alesia Balliu nuk është thjesht një emër, ajo është një zë që nuk mund të injorohet. Një grua që nuk pranon të jetë spektatore në një shoqëri që shpesh nxit indiferencën, por zgjedh të jetë aktore aktive e ndryshimit. Në një botë ku shumë heshtin, ajo flet. Dhe kur flet, nuk kalon pa u dëgjuar.