Në një rrëfim të ndjerë në “Podcast by Xhulio Radi”, kardiokirurgja Alesia Mehmeti ndau për herë të parë historinë që e bëri të ndjekë rrugën e mjekësisë. “Nuk e kisha menduar kurrë më parë,” – tha ajo – “por kur babai im u sëmur dhe iu desh t’i nënshtrohej një operacioni të rrezikshëm, ku shanset për të mbijetuar ishin të pakta, më ndryshoi jeta. Mendova se nuk do ta shihja më. Kur pas disa orësh doli mjeku dhe tha ‘operacioni doli me sukses’, në atë moment vendosa: do të bëhem mjeke – do të shpëtoj njerëz.”

Alesia Mehmeti është sot një nga profesionistet më të dalluara të Kirurgjisë së Zemrës në Qendrën Spitalore Universitare “Nënë Tereza” në Tiranë. Ajo është pjesë e një ekipi që zbaton teknika të avancuara si ndërhyrja minimal-invazive në valvulën aortike – një procedurë që lehtëson rikuperimin dhe rrit suksesin e ndërhyrjeve kirurgjikale.

Përtej kontributit klinik, Alesia është zë i fortë në mbrojtje të të drejtave të mjekëve të rinj. Ajo ka ngritur zërin për pagat e munguar të specializantëve, duke ndarë publikisht se ka investuar miliona lekë për t’u bërë mjeke, por ende nuk është paguar për punën e saj gjatë specializimit. “Duam të qëndrojmë në Shqipëri, por nuk mundemi pa dinjitet”, thekson ajo.

Me mbi 8 punime shkencore dhe përfaqësime në konferenca ndërkombëtare, Alesia nuk është vetëm një shembull profesionalizmi, por edhe një shpresë për sistemin shëndetësor shqiptar. Ajo bashkëvepron me ekipe të huaja dhe kontribuon në zbatimin e metodave bashkëkohore që deri pak vite më parë ishin të pamundura në vend.

Në një kohë kur shumë të rinj largohen nga Shqipëria për kushte më të mira, Alesia Mehmeti zgjedh të qëndrojë – me një motivim të thellë personal dhe mision njerëzor. Historia e saj është një thirrje për të vlerësuar mjekët që, përtej statistikave dhe orëve të gjata, e bëjnë profesionin një akt dashurie dhe shpëtimi.