Banka Evropiane e Investimeve (EIB) ka prezantuar TechEU Platform, një nismë të re që synon të lehtësojë aksesin në financim për startup-et dhe bizneset në rritje në Evropë. Programi ka për qëllim të mobilizojë investime deri në 250 miliardë euro deri në vitin 2027, duke përfshirë fusha si cleantech, shkencat e jetës, teknologjitë digjitale dhe sektorë të tjerë inovativë.

Platforma përfshin mjetin online Investment Readiness Checker, i cili ndihmon startup-et dhe scaleup-et të kuptojnë mënyrën se si EIB mund t’i mbështesë në rritjen e tyre. Ky funksion shërben si një “one-stop shop”, duke ofruar akses në hua, kapital, garanci dhe këshillim të personalizuar sipas nevojave të sipërmarrësve. Prezantimi zyrtar i mjetit do të bëhet më 27 gusht gjatë konferencës së inovacionit TechBBQ në Danimarkë.

Merete Clausen, Zëvendës Shefe Ekzekutive e EIF, deklaroi se qëllimi i TechEU Platform është të ndihmojë startup-et dhe scaleup-et evropiane të sigurojnë fondet e nevojshme për të rritur aktivitetin dhe për të pasur sukses. Platforma synon të mbështesë të paktën 1,000 kompani teknologjike çdo vit dhe të ofrojë lehtësira për sfidat e financimit gjatë zgjerimit të biznesit.

Vetëm për periudhën 2025–2027, EIB do të angazhojë 70 miliardë euro në forma të ndryshme financimi, duke përfshirë hua, kapital, garanci dhe investime të tjera. Platforma do të ofrojë gjithashtu këshillim dhe mbështetje në çdo fazë të zhvillimit të kompanive, duke përfshirë edhe periudhën para listimit në bursë. Prioriteti i parë do të jetë sektori i cleantech, me synimin për të tërhequr 18 miliardë euro investime dhe për të forcuar rolin e Evropës në energjinë e pastër.

Startup-et dhe sipërmarrësit e interesuar mund të njihen me më shumë detaje në panairin TechBBQ ose përmes aplikacionit online të eventit.