Në një intervistë domethënëse për podcastin me Jonën, At Grigor Pelushi, klerik i Kishës Orthodokse Autoqefale të Shqipërisë, ndau reflektime të thella mbi rolin e besimit në shoqërinë shqiptare, natyrën e marrëdhënies së njeriut me Zotin dhe domethënien e qëndrueshme të martirizimit për hir të fesë. Mesazhi i tij ishte i qartë: besimi është dhurata më e madhe që njeriu ka marrë nga Zoti dhe është themeli mbi të cilin ndërtohet një jetë e përmbushur.
At Grigori theksoi se njeriu është krijuar sipas shembëlltyrës së Zotit, për t’i ngjarë Atij në virtyte. Ai nënvizoi rëndësinë që njeriu të mos i drejtohet Zotit vetëm në momente të vështira, por edhe kur përjeton gëzim, kur merr bekime dhe kur gjithçka duket e qetë. “Zoti nuk është vetëm një strehë në stuhi, por burimi i jetës së plotë,” – tha ai.
Në një kohë ku shpesh besimi shihet si kufizues, At Grigori përmendi se besimi nuk e cenon lirinë e njeriut, përkundrazi, e ushqen atë me kuptim. Besimi nuk është imponim, por zgjedhje e ndërgjegjshme që e orienton njeriun drejt të vërtetës dhe dashurisë hyjnore. Siç thotë Apostull Pavli, “Besimi është siguria për gjërat që shpresohen dhe prova e gjërave që nuk shihen.”
Një pjesë e rëndësishme e reflektimeve të At Grigorit iu kushtua kujtimit të martirëve të fesë, veçanërisht në Shqipëri gjatë periudhës së komunizmit. “Kujt i kujtohet sot ai që persekutoi? Ndërsa klerikët e martirizuar për besimin i kujtojmë ende,” – tha ai. Si shembull përmendi Imzot Kristofor Kisin, një ndër figurat e ndritura të Kishës Orthodokse Shqiptare, por edhe figurat biblike si Apostujt Pjetri dhe Pavli, të cilët u martirizuan nga perandori Neroni. Edhe pse kanë kaluar mbi 2000 vjet, kujtimi i tyre është i gjallë, sepse ata dëshmuan me jetën e tyre vërtetësinë e besimit.
Në fjalën e tij, At Grigori shprehu mirënjohje për rritjen e pranisë së të rinjve në jetë shpirtërore. Ai e quajti këtë një shenjë shprese dhe rilindjeje shpirtërore në vendin tonë. Kujtoi gjithashtu rolin e lashtë të Shqipërisë në historinë e krishterimit, duke përmendur se në Durrës veproi Apostull Cezari, një nga 70 nxënësit e Jezusit, që dëshmon për lidhjen e hershme.
