Kur Brian Niccol mori drejtimin e Starbucks në shtator, kompania po përballej me sfida serioze: inflacion në rritje, trafik të ulët në dyqane dhe rënie të vazhdueshme të shitjeve. Për të rikthyer Starbucks në pozitat e dikurshme, Niccol ka prezantuar modelin e ri të shërbimit, të quajtur “green apron service model”, i cili fokusohet në mikpritje cilësore dhe efikasitet.

Në një intervistë për CNBC, drejtuesi 50-vjeçar shpjegoi se ky model do ta diferencojë Starbucks nga konkurrentët dhe do të nxisë rritjen e shitjeve. “Starbucks ka qenë e menaxhuar keq për disa vite, por ne jemi me fat që kemi një markë kaq të fortë dhe elastike. Me programet dhe strategjitë e duhura, do të rikuperohemi,” tha ai.

Javën e kaluar, Starbucks nisi trajnimin e baristëve për këtë model të ri shërbimi, që përfshin:

• Uljen e numrit të orëve të punës në dyqane, me staf minimal për efikasitet më të lartë;
• Përdorimin e një sistemi “smart queue” për dorëzimin e porosive brenda katër minutash;
• Ndërveprime më të personalizuara mes klientëve dhe stafit;
• Prezantimin e artikujve të rinj në menu.

Strategjia “Back to Starbucks” synon rikthimin tek themelet operacionale të biznesit, duke shërbyer si bazë për një rimëkëmbje më të shpejtë nga ajo që pritej. Të dhënat për tremujorin e fundit treguan rënie të shitjeve për të gjashtin tremujor radhazi, trend që nisi gjatë drejtimit të ish-CEO-së Laxman Narasimhan.

Analistët e Wall Street shprehen optimistë për këtë strategji. Sharon Zackfia nga William Blair thekson se fokusi nuk ishte te rezultatet zhgënjyese, por te sinjalet që tregojnë një rimëkëmbje premtuese. Ndërkaq, analisti Andrew Charles nga T.D. Cowen parashikon rritje të shitjeve për shkak të një “agjende më agresive të inovacionit”.

Brian Niccol ka një histori të suksesshme në transformimin e kompanive në vështirësi. Para Starbucks, ai ishte CEO i Chipotle, ku gjatë gjashtë viteve të tij përmirësoi ndjeshëm shitjet dhe rriti aksionet me 773%. Më parë, në Taco Bell, solli risi si porositë online dhe slogani i njohur “Live Más”.

“Jemi pa dyshim përpara pritshmërive në rikthimin tek baza operacionale,” tha Niccol, duke shtuar se kjo strategji do të sjellë një Starbucks më të mirë dhe më të fortë në treg.

Burimi: CNBC