Clark Olofsson, një nga figurat më të njohura të botës së krimit në Suedi, ka ndërruar jetë në moshën 78-vjeçare pas një sëmundjeje të gjatë, bëri të ditur familja e tij për median suedeze Dagens ETC. Ai u bë i famshëm në vitin 1973, pas një grabitjeje banke dhe rrëmbimi në Stokholm që çoi në lindjen e termit “sindroma e Stokholmit”.

Ngjarja ndodhi gjatë një rrethimi gjashtëditor të një banke, ku Olofsson iu bashkua një tjetër rrëmbyesi, Jan-Erik Olsson, me të cilin ishte njohur në burg. Ndërsa mbaheshin peng katër persona, ata filluan të ndjenin simpati dhe besim ndaj rrëmbyesve të tyre, ndërkohë që tregoheshin më armiqësorë ndaj forcave të policisë. Ky fenomen u quajt më vonë “sindroma e Stokholmit”, një reagim psikologjik i viktimave ndaj agresorëve të tyre.

Gjatë rrethimit, një nga pengjet, Kristin Enmark, foli me kryeministrin suedez në emër të rrëmbyesve, duke kërkuar që të mos përdorej dhunë dhe duke shprehur besim të plotë ndaj Olofsson. Pas mbarimit të ngjarjes, pengjet refuzuan të dëshmonin kundër Olofsson dhe Olsson, gjë që shtoi më tej debatet mbi fenomenin.

Në vitet në vijim, pati shumë diskutime mes ekspertëve nëse sindroma e Stokholmit është një gjendje e mirëfilltë psikologjike apo një mekanizëm i thjeshtë mbijetese. Vetë Enmark, në një intervistë të vitit 2021, mohoi ekzistencën e sindromës, duke theksuar se veprimet e saj ishin një përpjekje për të mbijetuar në një situatë të rrezikshme.

Clark Olofsson ishte i njohur për historikun e tij kriminal dhe kaloi pjesën më të madhe të jetës në burg. Ai u lirua për herë të fundit në vitin 2018. Jeta e tij u dramatizua në serialin e Netflix “Clark” në vitin 2022, ku u portretizua nga aktori suedez Bill Skarsgård.