Një studim i ri i prezantuar në Digestive Disease Week 2026 tregon se kombinimi i stresit të vazhdueshëm me ngrënien në orët e vona të mbrëmjes mund të rrisë ndjeshëm rrezikun e problemeve me sistemin tretës.
Studiuesit analizuan të dhënat e më shumë se 15 mijë personave nga dy kërkime të mëdha kombëtare dhe arritën në përfundimin se ata që konsumojnë mbi 25% të kalorive ditore pas orës 21:00, ndërsa përjetojnë edhe nivele të larta stresi, kanë deri në 2.5 herë më shumë mundësi të përballen me shqetësime si kapsllëku, diarreja dhe çrregullime të tjera të zorrëve.
Sipas ekspertëve, rëndësi nuk ka vetëm përzgjedhja e ushqimeve, por edhe koha kur ato konsumohen. Ora e vakteve ndikon në mënyrën se si organizmi përpunon ushqimin dhe funksionon sistemi tretës.
Studimi thekson gjithashtu se ngrënia vonë gjatë natës mund të ndikojë negativisht në mikrobiomën e zorrëve, duke ulur numrin dhe larmishmërinë e baktereve të dobishme që luajnë një rol të rëndësishëm në shëndetin e organizmit.
Ekspertët shpjegojnë se ky proces prek edhe lidhjen mes zorrëve dhe trurit, e njohur si boshti zorrë-tru, duke treguar se ritmi biologjik i trupit ndikohet ndjeshëm nga orari i vakteve.
Për këtë arsye, specialistët rekomandojnë që pjesa më e madhe e kalorive të konsumohet gjatë ditës dhe jo në orët e vona të mbrëmjes. Edhe ndryshime të vogla në orarin e ushqyerjes mund të ndihmojnë në përmirësimin e shëndetit të tretjes dhe në ruajtjen e ekuilibrit të baktereve të dobishme në zorrë.
