Në një kohë kur gjithnjë e më shumë fëmijë i largohen artit për t’iu përkushtuar teknologjisë, Drini Drishti vjen si një shembull frymëzimi për brezin e ri. Djali i dy figurave të njohura të medias shqiptare, Eniana dhe Ismet Drishti, Drini ka zgjedhur të ecë në rrugën e artit, duke përfaqësuar me dinjitet jo vetëm familjen, por edhe Shqipërinë në skena të rëndësishme kombëtare dhe ndërkombëtare.

Një nga pjesëmarrjet e tij më të fundit ishte në Festivalin e 63-të Mbarëkombëtar të Këngës për Fëmijë që u mbajt në Shkodër. Ky event, i organizuar nga Bashkia Shkodër, RTSH dhe Ministria e Ekonomisë, Kulturës dhe Inovacionit, mblodhi së bashku zërat më të mirë të fëmijëve nga e gjithë Shqipëria. Drini mori pjesë me një këngë të veçantë, e cila mbante një mesazh të fuqishëm për prindërit dhe për procesin e rritjes së fëmijëve.

Kënga titullohej “Dua”, dhe ishte një krijim i të atit, regjisorit Ismet Drishti, i cili ka realizuar si tekstin ashtu edhe muzikën. Orkestrimi i saj u realizua nga mjeshtri Shpëtim Saraçi, duke i dhënë veprës një dimension profesional dhe emocional. Teksti i këngës është një rrëfim i sinqertë dhe i gjallë i marrëdhënies së një fëmije me prindërit, me situata që çdo familje mund t’i njohë:

Dua të skuq një vezë

Zjarrin duhet ta ndez

Po mami që nga larg fillon bërtet

Driniii…

Apo:

Babi do t’m’përqafojë

E hopa do t’më çojë

O zot je bër i rëndë sa një ari

Drini…

Refreni i këngës, i ndjeshëm dhe me një thirrje të qartë emocionale, përcjell një mesazh të fortë:

Çdo ditë ne rritemi

S’na shikoni

Kokën ulur n’telefon

Ju kërkojmë sytë

Ju duam zërin

Mos humbni rritjen tonë

Drini e interpretoi këngën me shumë ndjenjë dhe siguri, duke marrë përgëzime jo vetëm nga juria, por edhe nga publiku, për mënyrën e natyrshme se si i solli fjalët e një fëmije. Kjo këngë nuk ishte thjesht një interpretim muzikor – ishte një mesazh për çdo familje shqiptare që shpesh, në ngutjen e përditshmërisë, harron se fëmijët nuk rriten vetëm me ushqim e shkollë, por edhe me vëmendje, fjalë të ngrohta dhe kohë të ndarë bashkë.

Çmimet e fituara nga Drini Drishti:

International Festival Polyhymnia 2025 Shkup

Festivali i 28 ndërkombëtar “Pianisti i ri “Epta”

Kompeticioni i 13 ndërkombëtar për të rinj “Dinu Lipatti” Tivoli Romë

Konkursi ndërkombëtar “Pjetër Gaci” edicioni 24

Konkursi ndërkombëtar “Tirana Talent” edicioni 16

Adriatik dance Fest edicioni 16-Ajri

Festivali i 63 kombëtar i këngës për fëmijë