Në një epokë ku efektet speciale dhe marketingu global dominojnë industrinë e filmit, buxhetet e filmave më të mëdhenj po kalojnë edhe misionet hapësinore. “Jurassic World Dominion” mban aktualisht rekordin si filmi më i shtrenjtë ndonjëherë, me një buxhet të rregulluar për inflacion që shkon deri në 628 milionë dollarë – më shumë se disa satelitë të NASA-s të dërguar në orbitë.

Pas tij, qëndrojnë tituj si “Star Wars: The Force Awakens” dhe “Pirates of the Caribbean: On Stranger Tides”, të cilët gjithashtu kapin shifra marramendëse, duke treguar se franchiset ikonike nuk kursejnë kur bëhet fjalë për spekatakël. Studio të mëdha si Disney dhe Universal janë të gatshme të shpenzojnë qindra miliona në shpresë të një kthimi po aq spektakolar në arkë.

Një pjesë e madhe e këtyre shpenzimeve nuk shkon vetëm për xhirimet, por për teknologjinë CGI të avancuar, pagesat e aktorëve të klasit A dhe fushata marketingu që përfshijnë çdo cep të globit. Që këto investime të justifikohen, studiot mbështeten jo vetëm në arkëtimet kinematografike, por edhe në platforma streaming, shitje DVD dhe të drejtash televizive, si dhe në produkte dytësore si lodra e bluza.

Megjithatë, rreziku është i lartë: një dështim në kinema mund të kthehet në humbje katastrofike për studiot, duke bërë që shumë prej tyre të hedhin bast vetëm mbi “emra të sigurt” – duke ndikuar në larmishmërinë dhe guximin artistik të industrisë. Kritikët thonë se Hollywood po rrezikon të bëhet më shumë biznes sesa art.

Në fund të ditës, këto shifra e bëjnë të qartë: nëse më parë ëndrrat fluturonin drejt hapësirës, sot ato xhirohen në ekranin e madh – dhe vijnë me një çmim kozmik.