Në kuadër të sezonit veror 2025, Autoriteti Portual Durrës ka nisur zbatimin e një plani të detajuar masash për të garantuar një shërbim efikas dhe të sigurt për pasagjerët që kalojnë përmes portit më të madh detar në vend. Flukset në rritje të turistëve dhe qytetarëve kanë kërkuar angazhim maksimal nga strukturat portuale dhe bashkëpunim të ngushtë me të gjithë aktorët e përfshirë.
Drejtori i Përgjithshëm Ekzekutiv i APD-së, Kreshnik Bajraktari, zhvilloi një inspektim në Terminalin e Trageteve për të verifikuar nga afër gjendjen dhe përgatitjet logjistike. Ai theksoi se masat janë hartuar në koordinim të plotë me institucionet shtetërore dhe subjektet private që operojnë në territorin portual, me qëllim ofrimin e një përvoje të sigurt dhe të këndshme për të gjithë udhëtarët.
Plani përfshin kontrollin rigoroz të hyrje-daljeve në port, përmirësimin e kushteve të pritjes për pasagjerët, dhe mbështetjen e shërbimeve shëndetësore në vend. Një vëmendje e veçantë i kushtohet rritjes së cilësisë së shërbimeve dhe ndërhyrjeve të shpejta në rast nevoje.
Gjithashtu, është garantuar bashkëpunimi i ngushtë mes forcave të rendit, autoriteteve doganore dhe operatorëve detarë për të menaxhuar flukset në mënyrë të koordinuar dhe për të parandaluar çdo problematikë gjatë pikut të sezonit turistik.
Autoriteti Portual Durrës synon jo vetëm të përmbushë standardet e sigurisë dhe efikasitetit, por edhe të rrisë imazhin e Shqipërisë si një destinacion mikpritës dhe të organizuar për vizitorët që mbërrijnë nga deti.
