Sipas të dhënave të INSTAT, shpenzimet e familjeve shqiptare për riparimin e pajisjeve elektronike dhe elektroshtëpiake kanë njohur një rritje të ndjeshme vit pas viti, duke arritur në një vlerë totale prej 10.2 miliardë lekë (rreth 103 milionë euro) vetëm në vitin 2023. Kjo shifër pasqyron një trend në rritje të vazhdueshme të kërkesës për shërbimet e riparimit të kompjuterëve, celularëve, televizorëve, furrave, lavatriçeve, frigoriferëve, dhe pajisjeve të tjera shtëpiake.
Në vitin 2021, të ardhurat e këtij sektori ishin rreth 6.75 miliardë lekë, ndërsa një vit më pas u rritën në mbi 8.6 miliardë lekë. Për vitin 2023, të ardhurat shënuan një rritje prej 18% në krahasim me 2022-n, duke dëshmuar se tregu i riparimeve po forcohet vazhdimisht.
Ky zhvillim ka disa shkaqe kryesore. Së pari, mungesa e specialistëve dhe zanatçinjve që merren me riparimin po rrit çmimet e shërbimeve, pasi shumë riparues zgjedhin të emigrojnë drejt vendeve të tjera të Evropës për shkak të kërkesës së lartë për profesionistë të këtij sektori në mbarë rajonin.
Së dyti, familjet shqiptare po rrisin përdorimin e pajisjeve elektronike dhe elektroshtëpiake çdo vit, duke rritur nevojën për mirëmbajtje dhe riparim. Pandemia COVID-19 ka qenë një tjetër faktor i rëndësishëm, pasi ajo rriti ndjeshëm përdorimin e kompjuterëve, laptopëve dhe celularëve për punë, mësim online dhe argëtim, duke sjellë një nevojë të shtuar për shërbimet e riparimit.
Gjithashtu, çmimet e larta pas pandemisë kanë bërë që shumë konsumatorë të preferojnë riparimin e pajisjeve ekzistuese në vend të blerjes së pajisjeve të reja, duke e bërë këtë zgjidhje më ekonomike. Për më tepër, platforma online kanë përmirësuar mundësinë e sigurimit të pjesëve rezervë, duke rritur efikasitetin e serviseve dhe duke ulur kohën e riparimit.
Në një shoqëri që po bëhet gjithnjë e më shumë e varur nga teknologjia, tregu i riparimeve pritet të njohë rritje të qëndrueshme në vitet në vijim. Megjithatë, zhvillimet demografike, si pakësimi i zanatçinjve në vend, po ushtrojnë presion mbi çmimet, duke e bërë riparimin një shërbim gjithnjë e më të kushtueshëm.
Ky fenomen është një pasqyrë e transformimit të sjelljeve të konsumatorëve dhe e adaptimit të tregut ndaj realitetit të ri teknologjik në Shqipëri, ku riparimi po kthehet në një alternativë e rëndësishme dhe e domosdoshme për shumë familje.
