Indrit Çullhaj në podcast me Xhulion foli rreth sfidave dhe sakrificave me të cilat është përballur për të arritur aty ku është sot. Indriti është fitues i 135 medaljeve ndërkombëtare, përfshi katër medalje të arta në Ballkan dhe pjesëmarrës në Lojërat Olimpike të Tokios 2020.
Sportisti më i vlerësuar në historinë e xhudos shqiptare, ai ka qenë kampion i Shqipërisë për 18 vitet e fundit, duke ndërtuar një shtyllë të fortë për këtë sport në vend Sot, Indriti është anëtar i Komitetit Ekzekutiv të Federatës Shqiptare të Xhudos, pas zgjedhjes së kryer në dhjetor 2024 nga Asambleja Zgjedhore.
Sportistët elitarë e kanë përzgjedhur për këtë rol, si shenjë respekti për kontributin e tij të vazhdueshëm dhe lidershipin në sport. Përveç karrierës si sportist, ai ka një palestër në Tiranë ku stërviten të rinjtë. “Punojmë për të nxjerrë kampionë – dhe ia kemi dalë,” tha ai me krenari, duke vlerësuar punën e përbashkët me të gjithë personat e talentuar që i janë bashkuar këtij sporti.
“Ka edhe vajza që e kanë qejf xhudon,” shtoi ai me entuziazëm, duke theksuar sesa e rëndësishme është pjesëmarrja e tyre.
Një djalë i talentuar që jep mesazhe të mira, jo vetëm me fjalë, por edhe me shembullin e tij. Bashkë me vëllezërit e tij dhe trajnerët (si i vëllai Shkurt Çullhaj dhe trajneri i njohur Driton Kuka), ai kontribuon në edukimin e të rinjve, por edhe në sensibilizimin e shoqërisë për faktin që edhe në Shqipëri mund të gjenden suksese të mëdha.
