Një sondazh i ri i realizuar nga kompania ndërkombëtare e konsulencës EY paralajmëron se shumë drejtues biznesi mund të jenë më pak të përgatitur sesa mendojnë për sfidat që sjell inteligjenca artificiale (IA). Në një mjedis ku teknologjia po përparon me ritme të shpejta, raporti nënvizon rrezikun që sjell një shkëputje mes perceptimit të drejtuesve dhe realitetit.

Sipas EY, drejtuesit e kompanive po përpiqen të përshtaten me ndryshimet që sjell IA, por shpesh pa një kuptim të thelluar mbi rreziqet që ajo përfshin. Partneri menaxhues global i EY, Jad Shimaly, thekson se ndërsa kompanitë përpiqen të jenë fleksibël në vendimmarrje, mungesa e qartësisë për përgjegjësinë dhe pasojat etike të IA-së mbetet shqetësuese.

Një tjetër zbulim i sondazhit është mospërputhja mes vetëbesimit të drejtuesve dhe perceptimit të konsumatorëve. Në kompanitë ku IA është integruar plotësisht, drejtuesit shpesh mbivlerësojnë praktikat e tyre të përgjegjshme, çka mund të dëmtojë besimin e publikut dhe të cenojë avantazhin konkurrues në një treg gjithnjë e më të ndikuar nga teknologjitë inteligjente.

Ndërkohë, raporti vëren se drejtuesit ekzekutivë shfaqin ndjeshmëri më të lartë ndaj rreziqeve etike dhe ndikimit social të IA-së, krahasuar me menaxherët e niveleve të mesme apo të ulëta. Kjo tregon një hendek në ndërgjegjësimin dhe përgjegjësinë për mënyrën si menaxhohet teknologjia brenda organizatave.

Së fundmi, sondazhi evidenton se çështje si dezinformimi dhe manipulimi janë më shqetësuese për publikun sesa humbja e vendeve të punës. Kompanitë që janë ende në procesin e integrimit të IA-së duket se janë më të vetëdijshme për shqetësimet e konsumatorëve, krahasuar me ato që e kanë zbatuar teknologjinë në masë. EY përfundon se rregulloret në zhvillim dhe një qasje më e përgjegjshme mund të nxisin më shumë besim te publiku.