Një letër e vitit 1952 e shkruar nga Albert Ajnshtajni, ku ai shpreh ndjesën për rolin e tij në nxitjen e krijimit të bombës bërthamore, është nxjerrë në ankand nga shtëpia Bonhams. Letra ishte një përgjigje për mikun e tij japonez, Katsu Hara, i cili e kishte pyetur pse mbështeti zhvillimin e armës shkatërruese, sidomos pas pasojave tragjike në Hiroshimë dhe Nagasaki.
Ajnshtajni nuk mori pjesë drejtpërdrejt në ndërtimin e bombës, por në vitin 1939 i shkroi një letër presidentit amerikan Roosevelt për të paralajmëruar se nazistët po përpiqeshin të ndërtonin një armë bërthamore, gjë që çoi në nisjen e Projektit Manhattan. Më vonë, ai e konsideroi këtë letër si “gabimin më të madh” të jetës së tij dhe u bë një zë i fuqishëm kundër luftës dhe armëve.
Në letrën e vitit 1952, ai pranon se ishte i ndërgjegjshëm për rrezikun e armëve bërthamore, por nuk shihte zgjidhje tjetër në atë kohë, duke besuar se ndalimi i një fitoreje naziste ishte prioritet. Ai bënte thirrje për zhdukjen e luftës dhe lavdëronte Mahatma Gandhin si një shembull i madh i rezistencës paqësore.
Letra u përkthye në anglisht në vitin 1953 nga fizikani Herbert Jehle me ndihmën e vetë Ajnshtajnit dhe u botua në një buletin shkencor. Dokumenti i nënshkruar, me korrigjime të dorës së Ajnshtajnit, pritet të shitet nga 100,000 deri në 150,000 dollarë.
