Në një episod të ngrohtë dhe reflektues të @podcastbyxhulioradi , @nardndoka — kryetari i Partisë Demokristiane dhe ish-Ministër i Shëndetësisë — ndau me publikun jo vetëm fragmente nga rruga e tij politike, por edhe ndjesitë e tij më njerëzore si prind, bashkëshort dhe qytetar i këtij vendi.
“Familja është mbi të gjitha” – kështu shprehet Ndoka, duke theksuar se ndonëse atdheu është i rëndësishëm, për të familja mbetet shtylla ku mbështetet gjithçka. “Shumë thonë ‘i pari është atdheu’, por unë mendoj ndryshe — sepse nëse nuk ke themele të forta në familje, nuk ke as ç’t’i japësh vendit.”

Në një rrëfim të sinqertë, Ndoka foli për sfidat e politikës dhe ndikimin e saj të drejtpërdrejtë në jetën e qytetarëve. “Ka shumë gjëra që duhen ndryshuar,” theksoi ai. “Politika nuk mund të jetë thjesht një betejë fjalësh apo interesash. Duhet t’i rikthejmë shpirtin, të mendojmë për njeriun.”
Ai vlerësoi rolin e bizneseve në zhvillimin e vendit, duke kujtuar me respekt emigrantët e parë shqiptarë, të cilët pasi përjetuan modele suksesi jashtë vendit, u kthyen për t’i sjellë këto përvoja në Shqipëri. “Ata janë shembulli se si përkushtimi, dija dhe eksperienca mund të ndërtojnë një ekonomi më të qëndrueshme.”

Ndërsa preku çështjen e largimit masiv të të rinjve, fjalët e Ndokës morën një ton emocional. “Edhe fëmijët e mi janë larguar,” tha ai me një buzëqeshje të hidhur. “Më merr malli t’i takoj, i shoh, por nuk kam guximin t’u kërkoj të kthehen. Çfarë i pret këtu?” — një pyetje që e lançon si reflektim për të gjithë.

Ky episod i podcastit nuk ishte thjesht një bisedë për politikën, por një pasqyrë e thellë mbi gjendjen e shoqërisë shqiptare, marrëdhënien me vendin dhe me veten. Ndoka, me stilin e tij të veçantë dhe shpesh herë të spikatur për shprehjet që thyen rutinën politike, rikujton se politika ka nevojë për më shumë njerëz që flasin me zemër.