Qeveria ka miratuar listën zyrtare të ish-kooperativave dhe ndërmarrjeve bujqësore, duke mundësuar njohjen e viteve të punës për të gjithë ata që kanë punuar në këto institucione para vitit 1993. Falë këtij vendimi, rreth 30 mijë qytetarë në vit do të përfitojnë të drejtën e pensionit pa pasur nevojë të ndjekin rrugë gjyqësore.
Procedura është thjeshtuar ndjeshëm: mjafton një deklaratë personale që vërteton se individi ka qenë banor i zonës ku ndodhej ish-ndërmarrja dhe ka qenë në moshë pune në periudhën e deklaruar. Në këtë mënyrë, eliminohen burokracitë dhe kostot për grumbullimin e dokumenteve të vjetra, të cilat shpesh kanë qenë të paplota apo të humbura.
Ligji njeh si periudhë pune të vlefshme çdo punësim në institucionet shtetërore deri më 1 tetor 1993, në ndërmarrjet bujqësore deri më 17 tetor 1992 dhe në kooperativat bujqësore deri më 19 korrik 1991. Për çdo kategori, paga referuese përllogaritet sipas vendimeve ekzistuese të Këshillit të Ministrave, që do të ndikojë në përmasën e pensionit.
Ministri Blendi Gonxhja theksoi se kjo nismë synon të korrigjojë padrejtësitë ndaj mijëra qytetarëve që nuk kishin mundësi të dokumentonin periudhat e punës, duke përmirësuar sistemin e pensioneve dhe duke garantuar një minimum ekonomik për këtë kategori përfituesish.
