Banka e Shqipërisë ka vendosur të kufizojë tarifat për transfertat hyrëse në euro që kryhen përmes sistemit SEPA, duke vendosur një tavan prej jo më shumë se 3 euro për çdo transaksion të tillë. Kjo masë synon të mbrojë konsumatorët nga tarifat e larta që shpesh aplikohen për transfertat ndërkufitare.
Për transfertat dalëse drejt vendeve të zonës SEPA, tarifat nuk do të lejohen të jenë më të larta se ato që aplikohen aktualisht për transfertat e brendshme në euro në Shqipëri. Kjo përfshin një strukturë komisionesh të përcaktuar sipas mënyrës së pagesës dhe vlerës së transaksionit.
Rregullorja gjithashtu nxit përdorimin e kanaleve elektronike për realizimin e pagesave, ku tarifat janë dukshëm më të ulëta se ato që aplikohen në sportelet bankare. Për shembull, transfertat përmes e-banking pritet të kenë një komision minimal, ndërsa ato në filiale bankare mund të arrijnë deri në 50 euro.
Vendimi vjen në kuadër të përgatitjeve për integrimin e Shqipërisë në sistemin SEPA, i cili do të lejojë kryerjen e transfertave ndërkombëtare në euro me shpejtësi dhe me kosto të ulët. Pritet që sistemi të jetë funksional nga tetori i këtij viti.
Kufizimi i tarifave për transfertat hyrëse konsiderohet si një hap i rëndësishëm për përmirësimin e efikasitetit të sistemit të pagesave në vend dhe për uljen e kostove për qytetarët dhe bizneset shqiptare që marrin pagesa nga jashtë.
