Në episodin më të fundit të Podcastit të Suksesit by Xhulio Radi, i ftuar ishte Valter Marashi, themeluesi i “Magazinës së Okazioneve”, një biznes që sot njihet si lider në tregun e mobiljeve të përdorura dhe të restauruara në Shqipëri. Historia e tij është shembull i qartë se asgjë nuk është rastësi: vizioni, vendosmëria dhe aftësia për të parë mundësinë aty ku të tjerët shohin krizë, janë elementët që ndërtojnë suksesin.

Nga lokalet te mobiljet

Valteri e nisi rrugëtimin në biznes përmes sektorit të bareve dhe restoranteve. Ai vuri re një problem të përbashkët: pronarët ndërronin shpesh arredimin për t’u përshtatur me konkurencën, por mobiljet rrallëherë shiteshin me vlerën e blerjes. Kjo e shtyu të kuptonte se pas çdo arredimi fshihej një mundësi e pashfrytëzuar.

Në vitin 2018, kur në treg nisi të ndihej kriza, Valteri vendosi të fokusohej në mobiljet e përdorura. Një vit më pas, me mbylljen e lojërave të fatit nga qeveria, ai grumbulloi me çmime shumë të ulëta bazën materiale që mbeti pa përdorim. “Jo vetëm që fitova të ardhura, por edhe krijova emër: vendi ku gjente gjëra cilësore me çmime të lira”, tregon ai. Ky ishte momenti që i dha hov “Magazinës së Okazioneve”.

Modele bashkëpunimi inovative

Sot, biznesi i tij nuk është thjesht tregti e mobiljeve të përdorura, por një koncept i plotë. “Ne bashkëpunojmë me klientin. Ose i riparojmë mobiljet ekzistuese – i rilyejmë, i restaurojmë dhe i rikthejmë si të reja – ose bëjmë shkëmbim, duke marrë mobiljet e tyre dhe duke i zëvendësuar me të tjera të restauruara ose krejtësisht të reja”, shpjegon Valteri.

Nga mobiljet tek eventet madhështore

Një tjetër dimension i biznesit është dhënia me qira e bazës materiale për evente. Rasti më i madh? Koncerti i Nikos Vertis në stadiumin “Air Albania”, ku “Magazina e Okazioneve” mobilizoi 23 trajlera me materiale. Ky fleksibilitet e ka bërë Valterin dhe ekipin e tij partnerë të besueshëm për organizime të rëndësishme.

Sekreti i suksesit sipas Valterit

Për Valter Marashin, nuk ka fat në biznes, përveçse të gjendesh në kohën dhe vendin e duhur. Pjesa tjetër është dëshirë, sakrificë dhe sfidë. “Kur je i suksesshëm, je i lumtur. Fati është vetëm një rastësi; suksesi ndërtohet me shumë punë”, shprehet ai.

Historia e tij është një mesazh i qartë për vizionarët e rinj: dëshira hap rrugën, ndërsa këmbëngulja e mban atë hapur.