Në një botë ku të rinjtë gjithnjë e më shumë e shohin të ardhmen jashtë vendit, historia e Azmer Dulevic është një frymëzim për këdo që beson ende te vlera e punës, ndershmërisë dhe përkushtimit. Ai është një inxhinier elektrik me përvojë, që ka dhënë kontributin e tij si pedagog në një universitet në Kuvajt, ku ndjeu për herë të parë çfarë do të thotë të vlerësohesh për atë që di dhe për mënyrën si e përcjell dijen.
Me dëshirën për t’u kthyer pranë familjes dhe për të dhënë ndihmesën në vendin e tij, Azmeri vendosi të rikthehej në Shqipëri. Por pritshmëritë e tij u përplasën me një realitet zhgënjyes. Në vend që të gjejë një treg pune të hapur dhe të etur për profesionalizëm, hasi në një sistem të mbyllur, ku aftësitë vihen në plan të dytë dhe prioritet kanë njohjet personale apo bindjet politike. “Askush nuk i shikonte aftësitë e mia, por vetëm nëse kisha miq,” thotë ai me një ndjesi të hidhur, por të kthjellët. Ndaj u detyrua të largohej sërish, këtë herë drejt Gjermanisë, ku menjëherë u vlerësua dhe punësua.
Përfshirja e tij në politikë nuk ka ardhur nga ambicie personale, por nga një dëshirë për të kontribuar dhe për të ndryshuar realitete që ai i ka përjetuar vetë. Në podcast, Azmeri shpreh mirënjohje për të gjithë ata që i besuan votën, por nënvizon se angazhimi politik nuk duhet parë si qëllim në vetvete. “Nëse politika nuk i shërben njerëzve të zakonshëm, atëherë ajo s’ka kuptim,” thotë ai. Ai nuk ka hyrë në politikë për t’u përshtatur, por për të thyer mendësitë që pengojnë njerëzit e ndershëm dhe të aftë të ecin përpara.
Pas një kohe të shkurtër, një tjetër kthesë do ta sillte sërish në Shqipëri. Por këtë herë me një vizion të qartë: të krijonte vetë një hapësirë për të punuar, për të kontribuar dhe për të ndihmuar të rinjtë që duan të mësojnë një zanat. Ai kuptoi se tregu kishte një boshllëk – një mungesë të madhe për shërbimet që ai ofronte si profesionist, dhe kështu lindi sipërmarrja e tij. Sot, Azmeri është i lumtur që kontribuon në formimin e të rinjve dhe në ringritjen e vlerës së zanatit në një shoqëri që duket se po e humb këtë lidhje.
