Nelson Weiper, talenti i lindur më 17 maj 2005 në Mainz të Gjermanisë, është një nga emrat më premtues të futbollit europian. Me gjatësi 1.92 metra, ai është një qendërsulmues i fuqishëm, teknik dhe me instinkt të lindur për golin. Ajo që pak veta dinë është se Weiper ka origjinë shqiptare nga nëna, gjë që e vendos automatikisht në radarët e Kombëtares shqiptare.
Weiper është rritur në akademinë e Mainz, një klub që njihet për zhvillimin e talenteve. Në sezonin e fundit me të rinjtë, ai regjistroi një bilanc mbresëlënës: 19 gola në 17 ndeshje, shifra që e bënë atë menjëherë objekt interesimi nga ekipet e Bundesligës dhe skautët e huaj. Po ashtu, me ekipet e moshave të Gjermanisë, veçanërisht me U-17, ka shkëlqyer me 10 gola në 11 paraqitje. Performanca e tij ka bërë që në media gjermane të cilësohet si një “diamant” që po pret të shpërthejë në elitë.
Më herët, ai ka deklaruar se është i vetëdijshëm për interesin që po i tregon Federata Shqiptare e Futbollit dhe se ndihet krenar për rrënjët që ka nga ana e nënës. Në një prononcim për mediat, Weiper është shprehur i hapur për një thirrje nga Shqipëria dhe nuk e përjashton mundësinë që të përfaqësojë ngjyrat kuqezi në të ardhmen.
Në Gjermani, Weiper është krahasuar me sulmuesin Sebastian Haller për shkak të stilit të tij të lojës: i fortë në ajër, i sigurt me topin në këmbë dhe i rrezikshëm në zonë. Ekspertët e përshkruajnë si një sulmues të kompletuar, me potencial për të qenë pjesë e një klubi të madh evropian në të ardhmen e afërt. Ai tashmë është aktivizuar edhe me ekipin e parë të Mainz, duke marrë minuta të vlefshme dhe duke treguar se është gati për nivelin e lartë.
Me ritmin që ka marrë karriera e Nelson Weiper, gjithçka tregon se ai është në rrugën dhe një emër i rëndësishëm në futbollin europian. Performancat e tij të hershme, kombinimi i forcës fizike me aftësitë teknike dhe instinkti i lindur për golin e bëjnë një prej sulmuesve më premtues të brezit të tij. Nëse vijon me këtë përkushtim dhe rritje, Weiper pritet të jetë jo vetëm pjesë e Bundesligës, por edhe objektiv për klubet më të mëdha në arenën ndërkombëtare.
