Plazhi i Durrësit po përjeton një ndryshim të dukshëm këtë sezon veror, teksa numri i pushuesve nga Kosova ka rënë ndjeshëm krahasuar me vitet e mëparshme. Për shumë biznese turistike, kjo shënon fundin e një periudhe kur vizitorët nga Kosova përbënin pjesën më të madhe të turistëve në bregdetin durrsak.

Pronarët e hoteleve dhe operatorët e sektorit thonë se disa faktorë ekonomikë dhe zhvillimet në tregun turistik kanë ndikuar në këtë ndryshim. Forcimi i lekut ndaj euros ka ulur fuqinë blerëse të pushuesve që vijnë nga Kosova, ndërsa mundësia për të udhëtuar më lehtë drejt vendeve të tjera ka bërë që shumë familje të zgjedhin destinacione si Greqia apo Bullgaria.

Në të njëjtën kohë, një pjesë e turistëve kosovarë po preferojnë edhe plazhet më të afërta në veri të Shqipërisë, si Shëngjini dhe Velipoja. Sipas operatorëve, edhe rritja e çmimeve të akomodimit dhe shërbimeve në disa zona bregdetare ka ndikuar në orientimin e tyre drejt alternativave të tjera.

Rënie të prenotimeve raportohet edhe nga tregje të tjera tradicionale, si Maqedonia e Veriut dhe Italia. Sipas ekspertëve të turizmit, shumë turistë italianë kanë zgjedhur këtë verë të kalojnë pushimet në bregdetin e vendit të tyre, veçanërisht në jug të Italisë.

Për të kompensuar këtë situatë, bizneset turistike në Durrës po përqendrohen te tregje të reja. Grupet e organizuara nga Polonia, Çekia, Bosnja, Ukraina dhe Norvegjia po zënë një peshë gjithnjë e më të madhe në rezervimet e këtij sezoni.

Megjithatë, operatorët kërkojnë edhe zgjidhje për disa problematika që, sipas tyre, ndikojnë në cilësinë e ofertës turistike. Ata ngrenë shqetësimin se hapësirat publike në plazh janë reduktuar për shkak të shtimit të shezlongëve dhe strukturave të vendosura nga bizneset përgjatë shëtitores, duke kufizuar zonat e lira për pushuesit dhe duke ndikuar në pamjen e vijës bregdetare.

Sipas përfaqësuesve të sektorit, përmirësimi i menaxhimit të plazheve dhe rritja e konkurrueshmërisë së çmimeve mbeten ndër sfidat kryesore për të rikthyer turistët tradicionalë dhe për të forcuar pozicionin e Durrësit si një nga destinacionet kryesore verore në vend.