E ftuar në Podcastin e Suksesit by Xhulio Radi, Ledia Fazlli rrëfeu një histori që të frymëzon dhe të mëson se suksesi nuk vjen kurrë rastësisht – ai ndërtohet me shumë punë, sakrifica dhe besim.
Prej 12 vitesh në biznes, Ledia drejton me sukses një skuadër që merret me përkthime zyrtare dhe konsulenca për viza dhe aplikime, duke u bërë një nga emrat e njohur në fushën e saj. Por rruga deri këtu nuk ka qenë aspak e lehtë.
Ledia ka punuar që 16 vjeç, duke provuar çdo profesion të ndershëm – nga shitëse, menaxhere biznesi, deri tek agjencitë turistike. “Kam bërë çdo punë vetëm që të mos rrija pa punë,” – thotë ajo. Për disa vite punoi edhe në një institucion shtetëror, por u largua padrejtësisht, siç ndodh shpesh në realitetin shqiptar. Ky moment nuk e ndaloi, përkundrazi i dha shtysën që të ndërtonte diçka të sajën.
Me licencën e përkthyesit zyrtar në dorë, ajo nisi rrugëtimin në tregun e punës. Fillimet ishin të vështira: nuk kishte kursime të mëdha, nuk kishte klientë dhe për muaj të tërë zyra e saj ishte bosh. Por Ledia nuk u dorëzua. “Ato sfida më rritën më shumë,” – kujton ajo. Korrektësia, cilësia, çmimet e drejta dhe lidhjet me njerëzit e duhur ishin çelësat që e ndihmuan të ndërtonte një emër të besueshëm.
Një tjetër veçori e saj është qëndrimi ndaj konkurrencës: “Unë nuk jam xheloze. Konkurrencën e shoh si aleate. Kur kemi shumë punë, ndajmë projekte me kolegët e tjerë. Kështu duhet të jetë konkurrenca.”
Sot, përveçse një grua e suksesshme në biznes, Ledia është edhe një influencere e ndjekur në rrjetet sociale. Fillimisht ajo nuk donte kurrë të shfaqej, por pas sugjerimit të një shoqeje, vendosi të bëjë një video për një temë të caktuar. Videoja u bë virale dhe që atëherë rrugëtimi i saj mori një tjetër drejtim.
Pas gjithë këtyre viteve, Ledia pranon se suksesi ka edhe çmimin e vet. Ajo ka sakrifikuar kohën me vajzën e saj gjashtëvjeçare, por beson se çdo nënë sipërmarrëse e kupton këtë sfidë.
Historia e Ledia Fazlli-t është dëshmi se kush nuk dorëzohet, arrin të ndërtojë jo vetëm një biznes, por edhe një trashëgimi për t’i frymëzuar të tjerët.
