Patatet e skuqura dhe ushqimet e tjera të gatuara në vaj të nxehtë nuk janë vetëm kërcënim për shëndetin fizik, por sipas një studimi të ri, mund të ndikojnë edhe në shëndetin mendor.
Një ekip kërkuesish nga Hangzhou, Kinë, duke analizuar të dhënat e 140,728 personave përgjatë një periudhe 11-vjeçare, ka zbuluar se konsumimi i shpeshtë i ushqimeve të skuqura lidhet me një rrezik 12% më të lartë të ankthit dhe 7% më të lartë të depresionit. Efekti ishte më i theksuar tek të rinjtë dhe sidomos tek ata që konsumojnë shpesh patate të skuqura.
Sipas studiuesve, një rol të madh mund ta ketë akrilamidi, një substancë e dëmshme që formohet gjatë skuqjes së ushqimeve të pasura me karbohidrate. Eksperimentet e bëra në zebra-fish treguan se ekspozimi i zgjatur ndaj akrilamidit shkaktonte ndryshime të sjelljes të ngjashme me ankthin dhe depresionin, si dhe çrregullime në metabolizmin e yndyrnave dhe inflamacion në tru.
Megjithatë, ekspertët theksojnë se këto gjetje nuk do të thotë domosdoshmërisht se ushqimet e skuqura janë shkaku direkt i problemeve të shëndetit mendor. Është po aq e mundur që njerëzit që ndihen të shqetësuar apo të trishtuar të priren të konsumojnë më shumë ushqime të tilla. Faktorë të tjerë si mënyra e jetesës, zakonet ushqimore, gjumi apo gjendja fizike mund të kenë gjithashtu ndikim.
Edhe pse rezultatet janë preliminare, studimi ngre një shqetësim të ri mbi ndikimin e ushqimeve të skuqura jo vetëm në trup, por edhe në mendje. Patatet e skuqura, hamburgerët dhe ushqimet “fast food” të ngjashme janë prej kohësh të lidhura me obezitetin, presionin e lartë të gjakut dhe sëmundjet kardiovaskulare. Tani, sipas këtyre gjetjeve, edhe shëndeti mendor mund të jetë në lojë.
